පීඨ ප්‍රකාශන දිනය 2025 – නිර්මාණ බාර ගැනිම සහ ඇගයීම් නිර්ණායක

පීඨ ප්‍රකාශන දිනය
ප්‍රකාශන සඳහා ත්‍යාග පිරිනැමීමට අදාළ නිර්ණායක

ගූගල් පෝරමය පිරවීමෙන් අනතුරුව පහත අයදුම්පත්‍රය පුරවා ඔබගේ ප්‍රකාශනයේ පිටපතක් සමඟ ආචාර්ය කෞශල්‍යා හේවාවසම් මහත්මියට (අපරාධවිද්‍යා හා අපරාධ යුක්ති අධ්‍යයනාංශය) ගෙනවිත් භාරදීමට කටයුතු කරන්න.

හැඳින්වීම
මානවශාස්ත්‍ර හා සමාජීයවිද්‍යා පීඨ අධ්‍යයන/ අනධ්‍යයන/ ශිෂ්‍ය ප්‍රජාවගේ ප්‍රකාශන කාර්යයන් ඇගයීමට ලක් කිරීමේ හා ඔවුන් වැඩිදුරටත් ප්‍රකාශන කාර්යය වෙත පෙලඹවීමේ පරමාර්ථ සහිතව පීඨාධිපති මහාචාර්ය ශිරාන්ත හීන්කෙන්ද මහාත්මාගේ සංකල්පයක් අනුව 2020 වර්ෂයේදී ආරම්භ කරන ලද පීඨ ප්‍රකාශන කමිටුව වර්තමානය වන විට අනු කමිටු ගණනාවක සක්‍රිය ක්‍රියාකාරිත්වය හමුවේ ශීඝ්‍ර ප්‍රගතියක් අත්පත් කර ගෙන ඇත. ප්‍රකාශන කමිටුවේ වාර්ෂික සැලැස්මට අනුව සෑම අධ්‍යයන වර්ෂයකම සාහිත්‍ය මාසයේදී යථෝක්ත පීඨ ප්‍රජාවගේ ප්‍රකාශන කාර්යයන් ඇගයීම සිදු කරනු ලැබේ. ඒ සඳහා පීඨ ප්‍රකාශන දිනය පවත්වන වසරට පෙර වසරේදී ඔවුන් විසින් ප්‍රකාශනයට පත්කර ඇති මුද්‍රිත හෝ ඩිජිටල් ප්‍රකාශන ඇගයීමට ලක්කෙරේ. සාරසංක්ෂේප, විස්තරාත්මක සාරසංක්ෂේප සහ පර්යේෂණ ලිපි ඇගයීමට ලක් නොවේ. ඒ ඒ ප්‍රකාශන අංග යටතේ සැලකිල්ලට ගනු ලබන නිර්ණායක මත පදනම්ව මෙකී ප්‍රකාශන ඇගයීමට ලක්කරනු ලැබේ. යම්කිසි ප්‍රකාශනයක් සඳහා විශ්වවිද්‍යාලය මගින් මුදල් ප්‍රතිපාදනයක් සිදුකර ඇත්නම්, ඒ සඳහා මුදල් ත්‍යාග පිරිනමනු නොලැබේ.

ප්‍රකාශන වර්ගය – මුද්‍රිත / මාර්ගගත කෘති ඇගයීම් නිර්ණායක
මුද්‍රිත / මාර්ගගත කෘති යටතේ ශාස්ත්‍රීය කෘති, නිර්දිෂ්ට කෘති, පරිවර්තන කෘති, නවකතා, කෙටිකතා, පද්‍ය සංග්‍රහ, සංස්කරණ, ගේය පද සංග්‍රහ යනාදි අංශවලට අදාළ ප්‍රකාශන සඳහා මුදල් ත්‍යාග ලබා දීමේදී කෘතියක අන්තර්ගත පිටු ප්‍රමාණය සැලකිල්ලට ගනු ලැබේ. කෘතිය පීඨ ප්‍රකාශන කමිටුව විසින් ඒ ඒ වසරේදී නිර්ණය කර ඇති කාල සීමාව ඇතුළත පළ කර තිබීම අත්‍යවශ්‍ය වන අතර අධ්‍යයන/අනධ්‍යයන/ශිෂ්‍ය යන සියලු පාර්ශ්ව සඳහා පහත පරිදි පොදු ඇගයීම් ක්‍රමයක් අනුගමනය කරනු ලැබේ.
පිටු 100ට අඩු – රු. 5000.00
පිටු 100ට වැඩි – රු. 10,000.00

ප්‍රකාශන වර්ගය – මුද්‍රිත / මාර්ගගත සඟරා සංස්කරණ
ඇගයීම් නිර්ණායක
මුද්‍රිත / මාර්ගගත සඟරා සංස්කරණ යටතේ අධ්‍යයන / අනධ්‍යයන / ශිෂ්‍ය යන පාර්ශව විසින් අධ්‍යයනාංශ හෝ බාහිර පාර්ශවයකට අනුබද්ධිතව අදාල වසරේදී සංස්කරණය කරනු ලබන සඟරා මෙහිදී ඇගයීමට ලක්කෙරේ. කණ්ඩායමක් මඟින් සංස්කරණය සිදුකරන විට ප්‍රධාන සංස්කාරකවරයා හෝ වරුන් සඳහා පමණක් මුදල් ත්‍යාග පිරිනමනු ලැබේ. පිටු 100ට අඩු – රු. 2500.00
පිටු 100ට වැඩි – රු. 5,000.00

ප්‍රකාශන වර්ගය – මුද්‍රිත හෝ මාර්ගගත පුවත්පත් ලිපි/සඟරා
ඇගයීම් නිර්ණායක
ලේඛකයාගේ ලිපි සහිත පුවත්පත් හෝ සඟරා ආදිය පීඨ ප්‍රකාශන කමිටුව විසින් නිර්ණය කර ඇති කාල සීමාව ඇතුළත පළ වී තිබීම අනිවාර්යය වේ. මේ සඳහා පුවත්පත් හෝ සඟරාවල පළ කර ඇති විශේෂාංග ලිපි, තීරු ලිපි හා සම්මුඛ සාකච්ඡා යනාදිය අදාළ කොට සැලකේ. එසේ පළ කරනු ලැබ ඇති ලිපි ශාස්ත්‍රීය වශයෙන් වටිනාකමක් සහිත වීම හෝ චින්තනාත්මක වශයෙන් සාධනීය ලක්ෂණ සහිත වීම පීඨ ප්‍රකාශන කමිටුවේ ඇගයීම් සඳහා පාදක වීමට බලපානු ඇත. අදාළ ලිපිවල ලේඛකයාගේ නාමය පැහැදිලිව සඳහන් කර තිබිය යුතුය. ඒ අනුව අධ්‍යයන/අනධ්‍යයන/ශිෂ්‍ය යන සියලු පාර්ශ්ව සඳහා පහත පරිදි එවැනි ලිපි සඳහා මුදල් ත්‍යාග පිරිනමනු ලැබේ.

වචන 3000ට වැඩි මුද්‍රිත හෝ මාර්ගගත පුවත්පත්/සඟරා ලිපියක් සඳහා – රු. 3000.00
වචන 3000 – 2000 අතර මුද්‍රිත හෝ මාර්ගගත පුවත්පත්/සඟරා ලිපියක් සඳහා – රු. 2000.00
වචන 2000 – 1000 අතර මුද්‍රිත හෝ මාර්ගගත පුවත්පත්/සඟරා ලිපියක් සඳහා – රු. 1000.00
වචන 1000ට අඩු මුද්‍රිත හෝ මාර්ගගත පුවත්පත්/සඟරා ලිපියක් සඳහා – රු. 500.00

ප්‍රකාශන වර්ගය – ඩිජිටල් ප්‍රකාශන (කෙටි චිත්‍රපට, ගීත, ශාස්ත්‍රීය විවරණ, කාලීන සාකච්ඡා)
ඇගයීම් නිර්ණායක

මෙම අංශය යටතේ ගැනෙන කෙටි චිත්‍රපට, ගීත, ශාස්ත්‍රීය විවරණ, කාලීන සාකච්ඡා යනාදි අංග සියල්ල රූපවාහිනී, ගුවන්විදුලි, යූ ටියුබ්, වෙබ් සයිට් හෝ වෙනත් ඩිජිටල් මාධ්‍යයක, ප්‍රකාශන කමිටුව නිර්දේශ කරන කාල සීමාව ඇතුළත පළවී තිබිය යුතුය. නිර්මාණකරු විසින් තමන්ට අදාළ සෑම නිර්මාණයකම ප්‍රකාශන අයිතිය තහවුරු කිරීම සඳහා, සුදුසු ලේඛන ඉදිරිපත් කිරීම අනිවාර්යය වේ. (ප්‍රකාශිත නිර්මාණයේ ඔහුගේ හෝ ඇයගේ නම සඳහන් ව තිබීම මෙහිදී සලකා බැලේ).

තවද නිර්මාණකරුවන් විසින් පළ කරනු ලැබ ඇති සෑම අංගයක් සඳහාම පීඨ ප්‍රකාශන කමිටුවේ ඇගයීම් සඳහා පාදක වේ. මේ හැරුණු විට එම නිර්මාණවල ගුණාත්මකභාවය, කාල පරාසය යනාදිය ද කමිටුවේ විශේෂ අවධානයට ලක් වේ. මෙකී කරුණු මත පදනම්ව පහත පරිදි අධ්‍යයන/අනධ්‍යයන/ශිෂ්‍ය යන සියලු පාර්ශ්ව සඳහා එම නිර්මාණවලට මුදල් ත්‍යාග පිරිනමනු ලැබේ. එක් කතුවරයකුගේ නිර්මාණ පහක් (05) සඳහා පමණක් මුදල් ත්‍යාග ලබාදෙනු ලැබේ.

කෙටි චිත්‍රපට – රු. 5000.00
ගීත – රු. 5000.00
ශාස්ත්‍රීය විවරණ – රු. 2500.00
කාලීන සාකච්ඡා – රු. 2500.00

ප්‍රකාශන වර්ගය – ඩිජිටල් ප්‍රකාශන (බ්ලොග් හෝ වෙබ් ලිපි)
ඇගයීම් නිර්ණායක

පීඨ ප්‍රකාශන කමිටුව මගින් නිර්දේශ කර ඇති කාල පරාසය ඇතුළත අදාළ ලිපි පළ වී තිබීම අනිවාර්යය වන අතර, ලිපිවල පවතින ගුණාත්මකභාවය, ප්‍රකාශන අයිතිය හා නැරඹුම් සංඛ්‍යාව (ඩසැඅි) යනාදි කරුණු මත පදනම්ව අධ්‍යයන/අනධ්‍යයන/ශිෂ්‍ය යන සියලු පාර්ශ්ව සඳහා පොදු ඇගයීම් ක්‍රමවේදයක් අනුගමනය කරනු ලැබේ. ප්‍රකාශන අයිතිය හා නැරඹුම් සංඛ්‍යාව සනාත කිරීම සඳහා ලේඛනයක් ඉදිරිපත් කළ යුතු ය (ීජරුැබ ීයදඑි).

බ්ලොග් හෝ වෙබ් ලිපි – රු. 1000.00

ප්‍රකාශන වර්ගය – ඩිජිටල් ප්‍රකාශන (බ්ලොග් අඩවි, වෙබ් අඩවි, යූ ටියුබ් නාලිකා සහ සක්‍රීය යූ ටියුබ් නාලිකා)
ඇගයීම් නිර්ණායක

මෙම අංශය යටතේ බ්ලොග් අඩවි, වෙබ් අඩවි හෝ යූ ටියුබ් නාලිකා පවත්වාගෙනයන්නන් පහත නිර්ණායක යටතේ පීඨ ප්‍රකාශන කමිටුවේ ඇගයීමට ලක් වේ.

යූ ටියුබ් නාලිකා
■ යු ටියුබ් නාලිකාව නොකඩවා පවත්වාගෙන යාම,
■ එක් වසරක් තුළ විකාශනය වු වීඩියෝ ගණන 25 ක් වීම,
■ ග්‍රාහකයින් සංඛ්‍යාව එක් වසරකදී 100 බැගින් වර්ධනය වීම

ක්‍රියාකාරී යූ ටියුබ් නාලිකා
● අඛණ්ඩව වර්ෂයක් පුරා පවත්වාගෙන යා යුතු ය.
■ සම්පූර්ණ පරිශීලකයන් 1000ට වැඩිවිය යුතු ය.
■ උඩුගත කර ඇති ඕනෑම වීඩියෝවකට නැරඹුම් වාර 1000 ඉක්මවිය යුතුය.

ක්‍රියාකාරී බ්ලොග් අඩවි / වෙබ් අඩවි
■ අඛණ්ඩව වර්ෂයක් පුරා පවත්වාගෙන යා යුතු ය.
■ අදාළ වර්ෂය තුළ අවම වශයෙන් ලිපි 10ක් තිබිය යුතු ය.

වෙබ් අඩවි/බ්ලොග් අඩවි/යූ ටියුබ් නාලිකා – රු. 10,000.00

මෙම ප්‍රකාශන සියල්ලේම ඇගයීම සම්බන්ධ අවසන් තීරණ පීඨ ප්‍රකාශන කමිටුව සතු ය.

පීඨ ප්‍රකාශන කමිටුව,
මානවශාස්ත්‍ර හා සමාජීයවිද්‍යා පීඨය,
ශ්‍රී ජයවර්ධනපුර විශ්වවිද්‍යාලය.
2025/01/01