මානවශාස්ත්‍ර හා සමාජීය විද්‍යා පිඨයේ, අපරාධවිද්‍යා හා අපරාධ යුක්ති අධ්‍යයනාංශයේ ජ්‍යෙෂ්ඨ කථිකාචාර්ය, ආචාර්ය සුනිල් රාජනෙත්ති සහ ඩබ්ලිව්. ඒ. සරත්චන්ද්‍ර යන මහත්වරුන්ගේ නවතම ශාස්ත්‍රීය ග්‍රන්ථය “අපරාධ විද්‍යාව න්‍යාය සහ සංකල්ප” ලෙසින් එළිදක්වා ඇත. මෙම කෘතිය රචනා කිරීමට පෙළඹවූ හේතුන් ලෙස කතුවරුන් දක්වා ඇත්තේ මෙවැනි අදහසකි.
අපරාධකාරී චර්යාව, අපරාධකරිත්වය, ප්‍රචණ්ඩත්වය, සහ ආක්‍රමණශීලිත්වය ලෝකයේ බොහෝ රටවල විද්‍යාත්මකව හාරන්නට කරන උත්සාහය ඉහළ මට්ටමක පවතියි. අපරාධ විද්‍යාව ඒ සඳහා ප්‍රමුඛ විෂය බවට පත්වෙයි. අපරාධවිද්‍යාව සහ අපරාධ යුක්තිය ප්‍රධාන වශයෙන්ම මුලික කරුණු කිහිපයක් ඔස්සේ විග්‍රහ කල හැකිය.
අපරාධ බිහිවීමට බලපාන හේතුන්
අපරාධකරුවන් බිහිවීමට බලපාන හේතුන්
නීති සම්පාදනය, අපරාධ යුක්ති පරිපාලනය
පුනුරුත්තාපනය, විශෝදනයන් හා අපරාධ නිවාරණය
අපෙ රටේ මේ විෂය වඩාත් විද්‍යාත්මකව හැදෑරීම යුගයේ අවශ්‍යතාවයක්ව පවතී. අපරාධකාරී චර්යාවන් හරිහැටි හදුනා ගැනීම මෙන්ම වඩාත් යහපත් ලෙසට අපරාධ යුක්ති ක්‍රමවේදය සකස්කර ගැනීමටත් වඩාත් වැදගත් වන්නේ විෂය පිළිබඳව පුළුල් දැනුමක් ලබා තිබීමය.
දැනටමත් පොලිසිය, බන්ධනාගාරය, පරිවාස, ළමා ආරක්ෂක, සමාජ සේවා, සුරාබදු, රාජ්‍ය නොවන සංවිධාන හා ආරක්ෂක අංශවල මෙන්ම ශ්‍රී ලංකාවේ ත්‍රිවිධ හමුදාවන් විෂයෙහි වඩාත් සුවිශේෂී විෂයයක් බවට පත්වන්නේ අපරාධවිද්‍යාවය. විශේෂයෙන්ම අපරාධවිද්‍යාවේ මුලික සංකල්පයන් මනෝවිද්‍යාත්මකව, ජීවවිද්‍යාත්මකව, සමාජ විද්‍යාත්මකව හැදෑරීම ඉතාම වැදගත් වෙයි. මෙම කෘතියෙන්ද විග්‍රහ කරන්නෙත්, විශ්ලේෂණය කරන්නට උත්සහ කරන්නෙත් මෙකි න්‍යායයන් සහ සංකල්පයන් කොතරම් දුරට ලාංකේය ජන සමාජයට ආදේශ කරගත හැකිද යන්නය.