උපාධි අපේක්ෂකයින් සඳහා වූ ජනශ්‍රැති පර්යේෂණ සැසිය 2016
ජනශ්‍රැති පිළිබඳ වූ පළමු පර්යේෂණ සැසිය මානව ශාස්ත්‍ර හා සමාජීය විද්‍යා පීඨය හා විශ්වවිද්‍යාලිය සංස්කෘතික මධ්‍යස්ථානය හා කලා පර්ශදයේ සංවිධානයෙන් 2016 දෙසැම්බර් මස 9 වන දින සුමංගල ශාලාවේදී පැවැත්වුණි. පර්යේෂණ සැසියේ මුලසුන ආචාර්ය ප්‍රණීත් අභයසුන්දර මහතා විසින්ද, ලේකම් ධුරය මහාචාර්ය චාමලී නහල්ලගේ මහත්මිය විසින්ද හෙබවූ අතර සැසියේ සම්බන්ධිකාරකවරිය ලෙස සංස්කෘතික මධ්‍යස්ථාන භාර නිලධාරිනී මයුරි තෙන්නකෝන් මෙනවිය කටයුතු කරන ලදී.
මෙම පර්යේෂණ සැසියේ මුලික අරමුණ විශ්ව විද්‍යාලීය උපාධි අපේක්ෂකයින් ගුණාත්මක පර්යේෂණ සඳහා දිරිමත් කිරීමත්, ශාස්ත්‍රීය සමුළුවක් සඳහා සහභාගී වීමට අවස්ථාව සලසා දීම හරහා ප්‍රාථමික උපාධි මට්ටමේදීම ඔවුන් තුළ පර්යේෂණ සංස්කෘතියක් ගොඩනගා ගැනීමටඅවස්ථාව සලසා දීමත්ය.
මෙම වසරේ ජනශ්‍රැති පර්යේෂණ සැසියෙහි තේමාව වුයේ “ අතීත උරුමය, අද දැක්ම, අනාගත අභිමානය” යන්නයි. මෙම තේමාවට සමගාමිව ආහාර සංස්කෘතිය, ජන සාහිත්‍යය, හෙළ වෙදකම, ජන ජීවිතය, ජන උරුමය, ජන ගී, ජන නැටුම්, ජන කලා ශිල්ප, ජන නාටක, අභිචාර විදි, සත්ව සහ ශාක පිළිබඳව වන විශ්වාස ආදී මාතෘකා ඔස්සේ පර්යේෂණ පත්‍රිකා ඉදිරිපත් කරන ලදී
එසේම පර්යේෂණ සැසියේ ප්‍රධාන දේශනය සෞන්දර්ය කලා විශ්ව විද්‍යාලයේ මහාචාර්ය පි. එම්. කරුණාරත්න බණ්ඩාර මහතා විසින් “ජනශ්‍රැතියෙන් පෝෂණය වුණු ශ්‍රී ලාංකීය බෙර වදන කලාව” යන තේමාව ඔස්සේ පැවැත්වීය.
මෙම පර්යේෂණ සැසියේ සුවිශේෂිත්වය වනුයේ ප්‍රථම වරට, මානව ශාස්ත්‍ර හා සමාජීය විද්‍යා ක්ෂේත්‍රයන්හි අධ්‍යයනයෙහි නියුක්ත උපාධි අපේක්ෂකයින් හට, ඔවුන්ගේ පර්යේෂණ, ශාස්ත්‍රීය සමුළුවකදී ඉදිරිපත් කිරීමට අවස්ථාව උදාවිමය. ශ්‍රී ජයවර්ධනපුර විශ්වවිද්‍යාලය, රුහුණ විශ්වවිද්‍යාලය, පේරාදෙණිය විශ්වවිද්‍යාලය, කැලණිය විශ්වවිද්‍යාලය, සෞන්දර්ය කලා විශ්ව විද්‍යාලය, ශ්‍රී පාලි මණ්ඩපය ආදී විශ්වවිද්‍යාල මෙන්ම මධ්‍යම සංස්කෘතික අරමුදල, සංස්කෘතික අමාත්‍යංශය ආදියෙහි විද්‍යාර්ථින් රැසකගේ සහභාගිත්වය පර්යේෂණ සැසියෙහි සුවිශේෂිත්වය තවත් ඔප්නන්වන්නට සමත් විය.
පර්යේෂණ සැසිය අවසානයේ පැවැත්වුණු සම්මාන උළෙලෙහිදී හොදම පර්යේෂණ සාරාංශයට හිමි සම්මානය ශ්‍රී පාලි මණ්ඩපය නියෝජනය කළ එච්. පි. ටි. ඩි. දයානන්ද මහතා විසින් “ජනශ්‍රැතියෙන් නිරුපණය වන සුමන දේව සංකල්පය පිලිබදව තුලනාත්මක අධ්‍යයනයක්” යන මැයෙන් ඉදිරිපත්කල පර්යේෂණ සාරාංශය සඳහා හිමිවිය. එසේම හොදම පර්යේෂණ සාරාංශ ප්‍රදර්ශනාත්මක ඉදිරිපත් කිරීම සඳහා වන සම්මානය “පුරාණ වළං තාක්ෂණය පිලිබඳ මානව වංශ පුරාවිද්‍යාත්මක අධ්‍යයනයක්:බෙලිඅත්ත පුවක් දන්ඩාව ග්‍රාමය ඇසුරින්” යන මාතෘකාව යටතේ සිදු කළ බෞද්ධ හා පාලි විශ්වවිද්‍යාලයේ උපාධි අපේක්ෂක කේ. එම්. සිරිලාල් මහතාට හිමිවිය.
ජනශ්‍රැති පර්යේෂණ සමුළුව පිළිබඳ විද්වත් අදහස් …
ජනශ්‍රැතිය වනාහි සෑම මිනිස් ජාතියකටම ආවේණික වූ ඒ ඒ ජාතියකට අයත් පෞරාණික සංස්කෘතික උරුමයි. ඒ දායාදය ජන ව්‍යවහාරයෙන්ම ලැබූ අත්දැකීම්, ඇසීමෙන් එක්රැස් කරගත් දැනුම් හා භාවිතයෙන්ම අඩු වැඩි වී ඔපලත් ජාතික වස්තුවකි. පරිසරය අනුවත් ජාතියක සංස්කෘතිය අනුවත් විවිධ ලක්ෂනාන්විත ජනශ්‍රැතිය සංස්කෘතියෙහි විශේෂ ලක්ෂණයකි. සාක්ෂරතාවය දියුණු තියුණු වන්නට පුරුදු පුහුණු වනවිට ජනශ්‍රැතියට අයත් කරුණු, කතන්දර, දේව කතා, ප්‍රස්තා පිරුළු, ජන කවි, ගැමි ව්‍යවහාර හා ශිල්ප ශාස්ත්‍රයන්ගේ මුලධර්ම ඇතැම් භාෂා මාධ්‍යයෙන් සටහන් කර තබන ලදී. ඉතිරි කොටස් කටපාඩම් කර හෝ සිතෙහි තබාගෙන ආරක්ෂා කරගනි. බොහෝ ජනශ්‍රැති මතකෙන් ගිලිහී යනුයේ ඒවා භාවිත නොකරන කල්හිය.
මානව විද්‍යා විෂයය 1959 සිට ශ්‍රී ජයවර්ධනපුර විශ්ව විද්‍යාලයේ සමාජ විද්‍යා හා මානව විද්‍යා අධ්‍යයනාංශයේ විෂයක් ලෙස උගන්වනු ලබන අතර මෙම විශ්ව විද්‍යාලයේ සංස්කෘතික මධ්‍යස්ථානය මුල් වී මෙම ජනශ්‍රැති පර්යේෂණ සැසිය සංවිධානය කිරීම කාලෝචිත බවද සඳහන් කරනු කැමැත්තෙමි.
උපකුලපති, මහාචාර්ය සම්පත් අමරතුංග
විලියම් තෝමස් නම් විද්වතා විසින් ජනශ්‍රැතිය යන්න හැදින්වුයේ ජනයාගේ ශ්‍රැතිය හැටියටයි. එහෙත් ජනතාවගේ කෙබඳු ඥානයක්ද? ජන ඥානය වූ කලි අත්දැකීමෙන්, අත්හදාබැලිමෙන් ජිවිතය නමැති මහා විදුහලින්, සංවිධානාත්මක ඉගෙනීමෙන් තොරව ලබන දැනුමයි.
ශ්‍රී ජයවර්ධනපුර විශ්වවිද්‍යාලයේ මහාචාර්ය නන්දසේන රත්නපාල, මහාචාර්ය තිස්ස කාරියවසම් මේ සම්බන්ධ බොහෝ ලේඛන ඉදිරිපත් කල විද්වතුන් දෙපළකි. සංස්කෘති සඟරාව අපි කුඩා කාලයේ කියැවූ ශාස්ත්‍රීය සංග්‍රහයකි. එහි නිරතුරු ජනකතා, ජන කවි, ජන ගයනා, ජන සංගීතය, ජන ක්‍රීඩා ගැන පළවූ ලිපි රචනා කියවූ හැටි අපට මතකය.
මෙය ඉතා වටිනා ක්ෂේත්‍රයකි. ජනශ්‍රැති පර්යේෂණ සම්මන්ත්‍රණයක් පැවැත්වීම කාලෝචිත ප්‍රයත්නයක් වන්නේ අද වනවිට මේ ජනශ්‍රැති එකතු කරමින් සිටින නිසාය. හුදු කෞතුක වටිනාකමක් ඇති නිසාම ඒවා එකතු නොකරයි. එහි අන්තර්ගත ජන දැනුම නුතන රෝගාතුර, කායික මානසික තත්ත්ව සහිත ජනතාවගේ යහපත් සෞඛ්‍ය සම්පන්න ජිවිතයට සතා සී පාවා, ජල දහරා, අහස පොළොව, ඇතුළු මුළු මහත් පරිසරයට ඉන් බොහෝ ප්‍රයෝජන ලබා ගත හැකි බැවිනි.
ආචාර්ය ඩි. පී. එස්. චන්ද්‍රකුමාර, පීඨාධිපති, මානව ශස්ත්‍ර හා සමාජීය විද්‍යා පිඨය.
ජනශ්‍රැතිය වූ කලි මුඛ පරම්පරාගතව පැවතෙන්නාවූ දැනුමයි. ඇතැමුන් පවසා ඇත්තේ ජනශ්‍රැතිය ඇත්තේ අතීත සමාජයේ පමණක් බවයි. එහෙත් නූතන ජන සමාජයේ ජනශ්‍රැතිය ඉපිදේ. එමෙන්ම ජනශ්‍රැතිය කටින්කට පැවතෙන නිසා ඒවා පොත පතෙහි පළකළ කල්හි ජනශ්‍රැතියක් නැතිවන බවද කියා ඇත. එහෙත් අද වන විට මේ මතවාද, අදහස්, සංකල්ප, සිද්ධාන්ත, බෙහෙවින් වෙනස් වූ අවස්ථා දැකිය හැකිය.
ජනශ්‍රැතිය පිළිබඳව සමාජ විද්‍යා මානව විද්‍යා අධ්‍යයනාංශය, සිංහල හා ජනසන්නිවේදන අධ්‍යයනාංශය, භාෂා, සංස්කෘතික අධ්‍යයන හා ප්‍රසාංගික කල අධ්‍යනාංශය මෙන්ම ඉතිහාසය පුරාවිද්‍යා ආදී සෑම අධ්‍යයනාංශයකම උගන්වනු ලැබේ. එසේම මේ අවස්ථාවේ ජනශ්‍රැතිය පිලිබඳ පර්යේෂණ සැසි වාරයක් සංවිධානය කරන්නට ලැබීම ඉතා ඵල ප්‍රයෝජනවත් කාර්යයක් වශයෙන් ද හඳුන්වනු කැමැත්තෙමු.
ආචාර්ය ප්‍රණිත් අභයසුන්දර, සභාපති,
මහාචාර්ය චාමලි නහල්ලගේ, ලේකම්,
ජනශ්‍රැති පර්යේෂණ සැසිය 2016.