ශ්‍රී ජයවර්ධනපුර විශ්වවිද්‍යාලයේ අපරාධවිද්‍යා හා අපරාධ යුක්ති අධ්‍යයනාංශය මගින් පවත්වනු ලබන අපරාධ මනෝවිද්‍යාව හා වරදකරුවන් උපදේශනය පිළිබඳ ඩිප්ලෝමා පාඨමාලාවේ දෙවන කණ්ඩායමත් සමග 2023 පෙබරවාරි 26 වන ඉරිදා දින අධ්‍යයන ක්ෂේත්‍ර චාරිකාවක් සඳහා වැලිකඩ බන්ධනාගාරය වෙත යන ලදී. මෙම පාඨමාලාවේ විෂයන් වන පෞරුෂ සංවර්ධන අධ්‍යයනය හා අපරාධ මනෝවිද්‍යාව යන විෂය්‍යන්හි විෂය අවශ්‍යතාවයන් සදහා මෙම ක්ෂේත්‍ර චාරිකාව සූදානම්කරන ලදී. මෙම අධ්‍යයන ක්ෂේත්‍ර චාරිකාව අපරාධ මනෝවිද්‍යාව හා වරදකරුවන් උපදේශනය පිළිබඳ ඩිප්ලෝමා පාඨමාලාවේ සමායෝජක මහාචාර්ය නෙරංජි විජේවර්ධන මහත්මියගේ සහ ඩිප්ලෝමා පාඨමාලාවේ සම්පත්දායකයෙකු ලෙස කටයුතු කරන අතිරේක බන්ධනාගාර කොමසාරිස් ජනරාල් චන්දන ඒකනායක මහතාගේ මූලිකත්වයෙන් සූදානම් කරන ලදී. මෙම ක්ෂේත්‍ර අධ්‍යයන චාරිකාව සදහා සිසුන් එකසියදහතුනක් (113) සහභාගී විය. වැලිකඩ බන්ධනාගාරයේ කාන්තා රැදවියන්ගේ රැදවුම්ගාරයන් හා කාන්තා පුනරුත්ථාපන වැඩසටහන්ද, පිරිමි රැදවියන් හා සම්බන්ධ විවිධ පුනරුත්ථාපන හා ආකල්ප වෙනස් කිරීමේ වැඩසටහන් නිරීක්ෂණය විය. නිරීක්ෂණ චාරිකාවෙන් පසුව ආරාධිත දේශනය සදහා අතිරේක බන්ධනාගාර කොමසාරිස් ජනරාල් චන්දන ඒකනායක මහතා සම්බන්ධ වූ අතර එතුමා විසින් බන්ධනාගාරයේ පුනරුත්ථාපන ක්‍රියාවලිය හා එහි ඵලදායිතීවය යන මාතෘකාව යටතේ දේශනයක් පැවැත්වීය. එම දේශනය අතරතුර බන්ධනාගාරය තුල දඩුවම් ලබන රැදවියන් කිහිපදෙනෙකුද පුනරුත්ථාපනයේ ඇති ඵලදායීත්වය පිළිබදව ස්වයං විචාරයක් සිදුකරන ලදී. දේශනය අවසානයේ ශිෂ්‍යප්‍රජාව, නිළධාරීන් සහ රැදවියන් විසින් සෞන්දර්යාත්මක ඉදිරිපත් කිරීම් වලින් යුක්ත වැඩසටහනක්ද පැවැත්වීය.
