සයිබර් ත්‍රස්තවාදය

පරිගණකය හා අන්තර්ජාලය යනු අප ජීවිතයේ එදිනෙදා අවශ්‍ය සාධකයකි. පුද්ගලයන් හා සමාජීය වශයෙන් මිනිසුන්ගේ ජීවිතය පහසුවෙන් ගත කිරීමට හැකියාව මෙමගින් ඇතිකොට තිබේ. එහිදී අන්තර්ජාලය වැදගත් තොරතුරු දැනගැනීමට, දත්ත සකස් කිරීමට, තොරතුරු යැවීම සහ හා ලබා ගැනීම සන්නිවේදනය, පරිගණක පාලනය, මෝස්තරකරණය වැනි විවිධ ප්‍රයෝජන අන්තර්ගතය. නමුත් ඉහත ආකාරයට භාවිත වූ අන්තර්ජාලය පසුකාලීනව විවිධ අරමුණු සඳහා භාවිත විය. එහිදී රටරටවල එදිරිවාදීකම්, වෛරයෙන් පිරි මැහීම සඳහා ද පරිගණකය සහ අන්තර්ජාලය භාවිත විය.

• ඉන්දියාවට එරෙහි පකිස්ථානය
• චිනයට එරෙහිව ඇමරිකාව
• ඊශ්‍රායලයට එරෙහිව පලස්තීනය
• තායිවානයට එරෙහිව චීනය

ආදී වශයෙන් තමන්ට එරෙහිව රටවලට විරුද්ධව අන්තර්ජාලය යොදාගත් අතර අන්තර්ජාලය තවත් එක් යුධ භූමියක් බවට මේ අනුව පරිවර්තනය විය. කොසෝවෝ, කාශ්මීර හා මැදපෙරදිග ප්‍රදේශයන්හි ගැටුම්වලදී පරිගණක ජාලයන්ට පහරදීමෙන් වෙබ් අඩවි මකා දැමීමට හෝ අන්තර්ජාල සේවා අවහිර කිරීම් සිදුවිය. කෙසේ වුවද එවැනි තත්ත්ව පූර්වාදර්ශ කොට ගත් ත්‍රස්තවාදීන් අන්තර්ජාලය තම ත්‍රස්තවාදී ක්‍රියා සඳහා භාවිත කිරීමට යොමු වී තිබේ.

තාක්ෂණික දියුණුව සමග ලොව වඩාත් තොරතුරු තාක්ෂණය මත පෙරට වඩා රැඳී සිටිනු ඇත. එසේම අන්තර් සම්බන්ධතාවන් ද ප්‍රකට කරනු ඇත. මෙවැනි තත්ත්ව තුළ බරපතල අභියෝගයක් බවට සයිබර් ත්‍රස්තවාදය පත් වී ඇත්තේ සාම්ප්‍රදායික ත්‍රස්තවාදී ක්‍රමවේදයෙන් යාන්ත්‍රික ක්‍රමවේයකට පරිවර්තනය වීමෙනි. එම නිසා දැනට සාම්ප්‍රදායික ලෙසින් සිදුකරන පහර දීම්වලට වඩා වැඩි විනාශයක් ත්‍රස්තවාදීන්ට සයිබර් ත්‍රස්තවාදයෙන් සිදුකළ හැකි බව විශේෂඥ මතයයි.

1997 දී පැන්ටගනය සිදුකළ අත්හදා බැලීම්වලින් පැහැදිලි වී ඇත්තේ සාමාන්‍ය පරිගණක හා වෙළඳපළෙන් බහුලව ලබා ගත හැකි මෘදුකාංග උපයෝගී කොට ගෙන පමණක් ඇමරිකානු නගර 911ක් අතර පවත්නා ජාල පද්ධතීන්ට හා සම්බන්ධතාවන් අවහිර කළ හැකි බවයි. 1998දී ඇමරිකාවේ රාජ්‍ය දෙපාර්තමේන්තු විසින් විදේශීය ත්‍රස්තවාදී සංවිධාන ලෙස ලයිස්තුගත කොට තිබූ සංවිධාන 30කින් 12ක් අන්තර්ජාලය තුළ වෙබ් අඩවි පවත්වා ගෙන යමින් සිටියහ. එල්.ටී.ටී.ඊ. සංවිධානයේ Tamilnet නැමැති වෙබ් අඩවිය මෙයට හොද නිදසුනකි. මාධ්‍ය වාර්තාකරුවන්, දේශපාලකයන් හා විවිධ ක්ෂේත්‍රයන්හි විද්වතුන් මතු කරන පොදු අදහසක් නම් සයිබර් ත්‍රස්තවාදීන් යයි පවසන අයට රටක ආරක්ෂාවට ආර්ථිකය පාලනය කරන පරිගණක පද්ධති හා ජාල, විද්‍යාත්මක ලෙස අකර්මන්‍ය හා අවුල් සහගත තත්ත්වයට පත් කළ හැකි බවත් එමගින් ලක්ෂ සංඛ්‍යාත ජනතාවගේ ජීවිත විනාශය කරා යොමු කළ හැකි බවත්ය.

සයිබර් ත්‍රස්තවාදය යනු,

සමස්ත සංකල්පයක් ලෙස ගත්කල සයිබර් ත්‍රස්තවාදය යන්න නිර්වචනය කිරීම ඉතාමත් සංකීර්ණ කරුණකි. එහිදී පරිගණක ක්ෂේත්‍රයේ භාවිත වන වචන හා යෙදුම් සමග බද්ධ කිරීමට උත්සහ දැරීමත්, කාර්යමය නිර්වචනයක් දීම වෙනුවට එයට නාට්‍යමය හෝ සංවේගාත්මක ස්වරූපයක් කා වැද්දීමට ගෙන ඇති උත්සාහයත් අර්ථකථනයක් සැපයීමට බාධාකාරී වන කරුණු අතර දක්නට ලැබේ. කෙසේ වුවද සයිබර් ත්‍රස්තවාදය පිළිබඳ වර්තමානයේ විවිධ විද්වතුන් හා රාජ්‍ය ආයතන අර්ථකථන ඉදිරිපත් කොට ඇත. ඒ අනුව, සයිබර් ත්‍රස්තවාදය යනු සයිබර් අවකාශය හා ත්‍රස්තවාදය එකට එකතු කිරීමකි. මෙමගින් අදහස් වන්නේ දේශපාලනික හෝ සමාජමය අරමුණු සඳහා රාජ්‍ය හෝ ජනතාව බිය ගැන්වීමට, සංත්‍රාසයක් උපදවීමට, භීතියට පත් කිරීමට පරිගණක ජාල පද්ධතීන් හා දත්ත ගබඩාවන්ට එරෙහිව නීති විරෝධි තර්ජන හා පහරදීම් සිදු කිරීම ලෙස හඳුනාගත හැකිය. ආයුධ ලෙස පරිගණක මෘදුකාංග භාවිත කරන අතර වෙබ් අඩවි හා ජාල තුළට පිවිස රහස්‍ය තොරතුරු විනාශ කිරීම හෝ විවිධ කඩාකප්පල්කාරී කටයුතු පරිගණකයක් ඉදිරිපිට අසුන්ගෙන සිදු කරනු ලබයි.

රටක තීරණාත්මක හා වැදගත් යටිතල පහසුකම්වලට එරෙහිව කරනු ලබන පහරදීම් ද සයිබර් ත්‍රස්තවාදය ලෙස සැලකිය හැකි නමුදු එය තීරණය වීම සිදු වන්නේ ත්‍රස්තවාදයෙන් සිදුවූ බරපතළ බලපෑම මතය. විද්වතුන් පෙන්වා දෙන ආකාරයට සයිබර් ත්‍රස්තවාදය සහ ආක්‍රමණික වාදය අතර බැඳීමක් පවතින බව සඳහන් කොට තිබේ. ඊට හේතු වී ඇත්තේ දේශපාලනික ක්‍රියාදාම සහ ආක්‍රමණ අතර සම්බන්ධතාවක් බවතින බැවිනි.

එසේම සයිබර් ත්‍රස්තවාදයෙහි අනිවාර්ය ප්‍රතිඵලයක් ලෙස පුද්ගලයන්ට හෝ ඔවුන්ගේ දේපළවලට එරෙහි බලපෑම සඳහන් කළ හැක. එහිදී පුද්ගලයන්ගේ දේපළවලට හානියක් පැවතිය ද අවම වශයෙන් පුද්ගලයන්ට භීතියක් ඇති කිරීමට සමත් වේ. ත්‍රස්තවාදී සංවිධානයක් විසින් එක් පුද්ගලයෙකුට හෝ කණ්ඩායමක අනුබල දීම මත අන්තර්ජාලයෙහි ක්‍රියාකරන ආක්‍රමණිකයන් ලෙස සයිබර් ත්‍රස්තවාදීන් හඳුන්වා දිය හැකිය. දේශපාලනික ක්‍රියාදාම සහ අන්තර්ජාල ආක්‍රමණිකයන් අතර වර්තමානයේ සම්බන්ධතාවක් පවතී. මෙහිදී ආක්‍රමණිකයන් ලෙස හඳුන්වනු ලබන්නේ පරිගණක තොරතුරු පද්ධති තුළට හොරෙන් ඇතුළු වී ඒවායේ තොරතුරු හා මෘදුකාංග විනාශයට ගොදුරු කිරීමට හා කඩාකප්පල් කිරීමට තැත් කිරීම හෝ එසේ කරන පුද්ගලයන්ය. සමහරවිට මුල්කාලයේදී ඔවුන්ට දේශපාලනික අරමුණක් හෝ ඉලක්කයක් නොතිබෙන්නට පුළුවන. ත්‍රස්වාදී සංවිධාන සමග සම්බන්ධ වීමත් සමගම ආක්‍රමණිකයන්ගෙන් ත්‍රස්තවාදය නිරූපණය කරයි. නිදසුනක් ලෙස හමාස්, අල්කයිඩා වැනි සංවිධාන යටතේ ක්‍රියාත්මක වන්නන් පෙන්වා දීමට පුළුවන.

සයිබර් ත්‍රස්තවාදය ක්‍රියාත්මක වන්නේ කෙසේද?

විශේෂඥයන් විසින් පෙන්වාදෙන ආකාරයට ප්‍රබල රාජ්‍යවල සිටින මේ ආක්‍රමණිකයන් හසුකර ගැනීම ඉතාමත් සංකීර්ණ කාර්යයකි. මුල්කාලයේදී ආක්‍රමණිකයන් විසින් තම සතුටට, තරගකාරීත්වයට, අලුත් දේ සොයා ගැනීමට අන්තර්ජාලය වැරදි ලෙස භාවිත කරන ලදි. වර්තමානයේ ත්‍රස්තවාදීන් සමග සම්බන්ධ වීමත් සමග මූල්‍යමය වාසි ලබා ගැනීමේ අපේක්ෂාවෙන් නූතන තාක්ෂණය සොරකම් කරන ජාවාරම්කරුවන් ලෙස කටයුතු කිරීමට ද ඔවුහු පෙළඹී සිටිති. මේ නිසාම ත්‍රස්තවාදීන් වෙනුවෙන් අන්තර්ජාලය වැරදි ආකාරයට යොදා ගෙන එක්වර විශාල මුදලක් ඉපයීමට මොවුනට හැකියාව ලැබී තිබේ.

සයිබර් ත්‍රස්ත්‍රවාදීන්ගේ ප්‍රකට ක්‍රියාවන් වන්නේ,

• වෙබ් අඩවියකට හොරෙන් ඇතුළු වී එතුළට විශාල තොරතුරු ගලනයක් උත්පාදනය කොට, වෙනත් තොරතුරුවලට ඇතුළුවීමට ඇති ඉඩකඩ වළකාලමින් එහි සාමාන්‍ය ක්‍රියාකාරීත්වයට බාධා පැමිණවීම.
• විද්‍යුත් තැපැල් දහස් ගණනින් එක්වරම වෙබ් අඩවියක් පිරෙන්නට සලස්වා එය ආක්‍රමණය කිරීම
• ත්‍රස්තවාදීන් විසින් අනුගමනය කරන ප්‍රධානතම පහරදීම ලෙස Hacking සහ Computer Breaking දැක්විය හැක. Dorothy Denning ගේ සුප්‍රසිද්ධ වාර්තාවක් වන “Is Cyber Terror Next” හි දැක්වෙන ආකාරයට Carnegie Mellon විශ්වවිද්‍යාලය විසින් පවත්වා ගෙන ගිය CERT/CC මධ්‍යස්ථානය විසින් 1997 දී පමණක් මේ ආකාරයේ පහරදීම් 2134 ක් වාර්තා කොට තිබේ. 2003 දී CERT/CC ආයතනයට අනුව පරිගණක ආරක්ෂාව සඳහා බලපාන සිද්ධි 137529 ක් වාර්තා වී ඇත.
• Computer Virus සහ Worms යොදා ගෙන පරිගණකවලට බලපෑම් කිරීම හා ජාල පද්ධති අකර්මන්‍ය කිරීම.

මෙහිදී කළ හැකි බලපෑම හා විනාශය අතිමහත්ය. නිදසුනක් වශයෙන් Red Worms නමැති වයිරසය මගින් 2010 ජූලි මාසයේ පරිගණක දෘඪකාංග ශා මෘදුකාංගවලටත්, ජාලයවලටත් කළ විනාශය ඩොලර් බිලියන 2.6 ඉක්මවයි. I Love You නමැති වයිරසය 2000 වර්ෂයේදී අන්තර්ජාල පරිහරණය කරන්නන් මිලියන 20කට හානි පැමිණ වීය.

සයිබර් අවකාශය යුධබිමක් වීමට හේතු

ත්‍රස්තවාදීන් අන්තර්ජාලය තවත් එක් යුධ භූමියක් ලෙස භාවිතයට ගැනීමට විවිධ හේතු බලපා තිබේ.

• සාම්ප්‍රදායික ත්‍රස්තවාදී ක්‍රමවලට වඩා මෙය වඩාත් වාසිදායක වීම.
  මෙහිදී අඩුවියදමක් දැරීමට සිදුවන අතර අවශ්‍ය වන්නේ අන්තර්ජාල පහසුකම් හා පරිගණක දෘඪාංගය. තුවක්කු හෝ අධිබලැති පුපුරන ද්‍රව්‍ය මිලදී ගැනීමට හෝ පරිහරණය කිරීමට අවශ්‍ය නොවේ.
• නිර්නාමික සන්නිවේදනය තුළ හඹා යාම සහ ආක්‍රමණිකයන්ට බාධා කිරීම අපහසු වීම.
• පුද්ගලයන් හා ස්ථානගත වීම ආදී කරුණු සැඟවීමට ඇති හැකියාව.
• ශාරීරික බාධක හෝ මාර්ග බාධක නොමැති වීම.
  මෙහිදී සාම්ප්‍රදායික ත්‍රස්තවාදියෙකුට මෙන් ආරක්ෂක මුරපොළවල්, දේශසීමා, රේගුව පසුකර යාම අවශ්‍ය නොවේ.
• තොරතුරු ගලා යාම වේගවත් වීම.
• සයිබර් ත්‍රස්වාදියෙකු සතු සතුරු ඉලක්ක විවිධය. අපුමාණය. ඒවා රාජ්‍ය හා රාජ්‍ය නොවන, පෞද්ගලික ආයතන, සංවිධාන හා සේවා විය හැකිය.
• ලෝකයේ ඕනෑම තැනක සිට අන්තර්ජාලය හරහා ත්‍රස්තවාදී කටයුතු පවත්වා ගෙන යා හැකි වීම.
  මෙහිදී අවශ්‍ය වනුයේ මානසික ආයෝජනයක් පමණි. කය වෙහෙසා කරන භෞතික හා ශාරීරික මෙන්ම අවි පුහුණුවක් ද ඉතා අඩුය. මේ නිසා එවැනි පහරදීමකට ත්‍රස්තවාදීන් යොදා ගැනිම හා කැමති කර ගැනීම පහසුය.
• විශාල පිරිසකට එරෙහිව හානි සිදුවන ආකාරයෙන් භාවිත කළ හැකිවීම.
  රටක සාමාන්‍ය ජනතාවට අවශ්‍ය යටිතල පහසුකම් එනම් විදුලිය, ජල සැපයුම, සන්නිවේදන ජාල බැංකු හා මූල්‍ය සේවා ආරක්ෂාව, ගුවන් ගමනාගමන මෙන්ම පොදු සේවා පහසුකම් එනම් සෞඛ්‍ය සේවා, මහාමාර්ග හා දුම්රිය සේවා, ගිනි නිවීම ආදී සම්පූර්ණයෙන්ම ව්‍යාකූලතාවකට අවුල් සහගත තත්ත්වයකට පත් කිරීමේ හැකියාව සයිබර් ත්‍රස්තවාදය තුළ වේ. එම නිසා සයිබර් ත්‍රස්තවාදය ලොව අනාගත සාමයට විභව තර්ජනයකි. මෙය සාම්ප්‍රදායික ත්‍රස්තවාදයේ යාන්ත්‍රික මුහුණුවරකි. අනතුරු ඇඟවීමකි.

කෙසේ වුවද තවමත් සයිබර්ත්‍රස්තවාදය පිළිබඳ අප තුළ ඇත්තේ නිවැරදි දැක්මක් හා අවබෝධයක් නොවේ. එයට හේතුව සැබෑ සයිබර්ත්‍රස්තවාදයේ සැබෑ ප්‍රහාරයක් තවමත් නිසි පරිදි වාර්තා ගත වී නැති හෙයිනි. දිනක අධි බලවතුන් බවට පරිගණක පත් වේ. ඒවා මුළු ලෝකයම පාලනයට නතු කරගනු ඇත.

මූලාශ්‍ර:

1. www.symantec.com/avcenter/reference/cyberterrorism.pdf
2. www.crime-research.org/articles/Cyber_Terrorism_new_kind_Terrorism/
3. www.cs.georgetown.edu/~denning/infosec/cyberterror.html
4. http://en.wikipedia.org/wiki/Cyberterrorism
5. http://csciwww.etsu.edu/gotterbarn/stdntppr/
6. www.directionsmag.com/article.php?article_id=432
7. http://www.perfecttermpapers.com/term-papers/cyber-terrorism.html
8. http://mishpat.net/law/Cyberlaw/cyber_crime/cyber_terrorism/index.shtml
9. http://www.carlaabye.com/a462221-cyber-operations-and-cyber-terrorism.cfm
10. http://en.citizendium.org/wiki/Cyber_Terrorism

ආචාර්ය සුනිල් රාජනෙත්ති
අපරාධවිද්‍යා හා අපරාධ යුක්ති අධ්‍යයනාංශය