විනිවිද කථන ග්‍රන්ථ ව්‍යාපෘතිය (Winividha audio books project)

අප විශ්වවිද්‍යාලයේ මෙන්ම අනිකුත් උසස් අධ්‍යාපන ආයතනවල හා විශ්ව විද්‍යාලවල අධ්‍යාපනය හදාරනු ලබන දෘශ්‍යාබාධිත විද්‍යාර්ථයින්ගේ පහසුව සඳහා විනිවිද කථන ග්‍රන්ථ ව්‍යාපෘතිය ක්‍රියාත්මක කරනු ලැබේ. දැනට එය ශ්‍රී ජයවර්ධනපුර විශ්වවිද්‍යාලයේ මානව ශාස්ත්‍ර හා සමාජීය විද්‍යා පීඨයට අයත් ව්‍යාපෘතියක් වශයෙන් ක්‍රියාත්මක වෙමින් පවතියි.

මෙහි මූලාරම්භය සිදු වූයේ 2017 වර්ෂයේ දී ය. එහි දී මේ සඳහා මූලිකත්වය ගෙන කටයුතු කරන ලද්දේ මහාචාර්ය මැදගොඩ අභයතිස්ස ස්වාමීන් වහන්සේ විසිනි. උන්වහන්සේ සිය පෞද්ගලික ධන පරිත්‍යාගයෙන් පුරා වසර හතරක පමණ කාලයක් මෙම කථන ග්‍රන්ථ සැකසීමේ කටයුතු සඳහා අනුග්‍රහය දැක් වූ සේක. ඉන් අනතුරු ව 2021 වර්ෂයේ දී එය මානව ශාස්ත්‍ර හා සමාජීය විද්‍යා පීඨය යටතට ගෙන පාලනය වන  ව්‍යාපෘතියක් බවට පත්ව ඇත. මෙම ව්‍යාපෘතිය සඳහා දෘශ්‍යාබාධිත සරසවි සිසුන් සඳහා වැදගත්‍ කෘති ගණනාවක් දැනටමත් ශ්‍රව්‍ය (Audio) තාක්ෂණයට නඟා ඇති අතර, තවදුරටත් ක්‍රියාත්මක වන ව්‍යාපෘතියක් බැවින් තවත් ග්‍රන්ථ රාශියක් සැකසෙමින් පවතියි.

විනිවිද කථන ග්‍රන්ථ ව්‍යාපෘතිය හරහා පහත මාතෘකාවන්ට අයත් කෘති ඔබට ශ්‍රව්‍ය (Audio) තාක්ෂණයෙන් ලබා ගත හැකි ය.

•  සිංහල
• ඉතිහාසය
• මනෝ විද්‍යාව හා දර්ශනය
• බෞද්ධ ශිෂ්ටාචාරය
• දේශපාලන විද්‍යාව
• සමාජ විද්‍යාව
• ජන සන්නිවේදනය
• රජයේ විභාග සඳහා උපකාර ග්‍රන්ථ
• පර්යේෂණ ක්‍රමවේදය හා නිබන්ධන රචනයට අදාළ ග්‍රන්ථ
• වෙනත් වැදගත් කෘති

මීට අමතර ව කිසියම් කෘතියක් ඔබගේ විශ්වවිද්‍යාල අධ්‍යාපන කටයුතු සඳහා අවශ්‍ය වූ විට එය ශ්‍රව්‍ය (Audio) තාක්ෂණයට තවමත් නඟා නොමැති කෘතියක් නම් මෙම කථන ග්‍රන්ථ ව්‍යාපෘතිය හරහා එවන් ග්‍රන්ථ ශ්‍රව්‍ය (Audio) තාක්ෂණයට හරවා ලබා ගැනීමේ හැකියාව ද ඔබ වෙනුවෙන් ලබා දී ඇත. ඒ සඳහා ඔබ කළ යුතු වන්නේ අදාළ කෘතිය පිළිබඳ තොරතුරු එය ඔබට අවශ්‍ය වන දිනයට අවම වශයෙන් මාසයකට පමණ පෙර කථන ග්‍රන්ථ ව්‍යාපෘතියේ සම්බන්ධීකාරක සත්‍යා නිර්මානි මහත්මිය වෙත දැනුම් දීම යි. ඇය සම්බන්ධ කර ගත හැකි දුරකථන අංක ද මා විසින් මෙහි දී ඔබට ලබා දී ඇති දුරකථන අංක ලැයිස්තුවේ ඇතුලත් කර ඇත.

එසේම දැනට විනිවිද කථන ග්‍රන්ථ ව්‍යාපෘතිය මඟින් ශ්‍රව්‍ය (Audio) තාක්ෂණයට නඟා ඇති ග්‍රන්ථ නාම ලේඛනය ද ඔබගේ පහසුව සඳහා පහළින් ඇතුලත් කරමි. එය පරිශීලනය කර ඔබට අවශ්‍ය කථන ග්‍රන්ථ එහි ඇත්නම් ඉහත කී සත්‍යා මහත්මිය සම්බන්ධ කර ගැනීමෙන් ඒවා ඔබට පහසුවෙන් ලබා ගත හැකි ය. ඔබට අවශ්‍ය කෘති පිළිබඳ ඇය වෙත දැනුම් දුන් පසු ඇය ඒවා ගූගල් ඩ්‍රයිව් ලින්ක් හරහා ඔබට බාගත කළ හැකි පරිදි ලබා දීමට කටයුතු කරනු ඇත.

ඔබේ මිතුරන් මෙම ව්‍යාපෘතිය සමග සම්බන්ධ වී ග්‍රන්ථ කියවීමට කැමති නම් ඔවුන් පිළිබඳ තොරතුරු ද සත්‍යා මහත්මිය වෙත ලබා දීමට ඔබට හැකියාව ඇත. එලෙස ශ්‍රව්‍ය (Audio) ග්‍රන්ථ සඳහා හඬ දායකත්වය සපයන සිසුන් හට ඔවුන් විසින් කියවනු ලබන එක් මුද්‍රිත පිටුවක් සඳහා රුපියල් 10 බැගින් ගෙවීමක් සිදු කෙරෙන අතර, විශ්වවිද්‍යාලයේ ව්‍යාපෘතියකට සම්බන්ධව ක්‍රියා කළ බවට සහතික පත්‍රයක් ද ලබා ගත හැකි ය.

මෙම කථන ග්‍රන්ථ ව්‍යාපෘතිය මඟින් සකස් කරනු ලබන කෘති අප විශ්ව විද්‍යාලයේ පමණක් නොව අනිකුත් විශ්ව විද්‍යාලවල අධ්‍යාපනය හදාරන ඕනෑම සිසුවෙකුට හෝ ශ්‍රී ලංකාව තුළ ජීවත් වන ඕනෑම දෘශ්‍යාබාධිත අයෙකුට ලබා ගත හැකි ය. ඒ සඳහා ඔවුන් කළ යුතු වන්නේ අවශ්‍ය ග්‍රන්ථ නාමයන් විනිවිද කථන ග්‍රන්ථ ව්‍යාපෘතිය වෙත යොමු කිරීම පමණකි. එවිට අදාළ ග්‍රන්ථ දැනටමත් කථන ග්‍රන්ථ ව්‍යාපෘතිය හරහා ශ්‍රව්‍ය (Audio) තාක්ෂණයට නඟා ඇත්නම් ඒවා හැකි ඉක්මනින් ඔබ වෙත ලැබීමට සලස්වනු ලැබේ. එපමණක් නොව හැකියාව ඇත්නම් එසේ තවමත් ඕඩියෝ තාක්ෂණයට නඟා නොමැති ග්‍රන්ථ ශ්‍රව්‍ය (Audio) තාක්ෂණයට නැඟීමට ද උස්සාහ කරනු ලැබේ.