සුභාශිංශන!
උසස් අධ්‍යාපනයේ සිහින යථාර්ථයක් කිරීම උදෙසා ගුරු – සිසු – දෙමාපිය ඇතුළු සියලු පාර්ශ්ව විසින් කරන ලද අනුපමේය කැප කිරීම්වල ප්‍රතිඵල අත්දැකීමට කාලය උදා වී ඇත. ශ්‍රී ලාංකේය සිසු දරු පරපුරට අභිමානවත් අනාගතයක් උදා කිරීමේ නොතිත් මෙහෙවරෙ හි විරාජමාන සංකේතය වූ විදුදයේ මානවශාස්ත්‍ර හා සමාජීයවිද්‍යා පීඨයේ සාඩම්බර උපාධිධාරී විද්‍යාර්ථියකු වශයෙන් අද වන විට, 2019 වසරේ දී විදු බිමට පා තුබූ ඔබ ව අභිෂේක ගැන්වීමට හැකිවීම ශ්‍රී ජයවර්ධනපුර විශ්වවිද්‍යාලයීය මානවශාස්ත්‍ර හා සමාජීයවිද්‍යා පීඨ ප්‍රජාව සාමූහිකව අත්පත් කරගත් ජයග්‍රහණයකි.
විවිධ අර්බුද හමුවේ වුව ද, පීඨ ආචාර්ය මණ්ඩලය විසින් කරන ලද අනභිභවනීය කැප කිරීම්, මෙම ජයග්‍රහණය පිටුපස අත්‍යන්තයෙන් ම පවතින බව කෘතවේදී ව සිහිපත් කරමි. එමෙන්ම පීඨයේ අනධ්‍යයන කාර්ය මණ්ඩලය ඉටු කළ මා හැ`ගි මෙහෙවර ද විශේෂයෙන් සිහිපත් කරමි. එසේ ම පීඨ සිසු දරුවන් වශයෙන් ඔබ ද අප වෙත ලබා දුන්නේ අතිමහත් සහයෝගයකි. විශේෂයෙන් ප්‍රතිඵල ලබා දෙන තුරු ඉතා ඉවසීමෙන් යුතුව සිටිමින්, විදුදය විද්‍යාර්ථියකු වශයෙන් ඔබ විසින් පෙන්වන ලද විශිෂ්ටත්වය, ඔබගේ අනාගත වෘත්තිය ජීවිතය ද ඔපවත් කරවන බව නිසැක ය.
මෙසේ විශ්වවිද්‍යාල අධ්‍යාපනය නිසි ලෙස අවසන් කර උපාධිධාරියකු වශයෙන් නව ලොවට පිවිසෙන ඔබගේ අනාගත ජීවිතය සර්වප්‍රකාරයෙන් ම සාර්ථක වේවා!
මහාචාර්ය ශිරාන්ත හීංකෙන්ද
පීඨාධිපති
මානවශාස්ත්‍ර හා සමාජීයවිද්‍යා පීඨය
2023.04.27