ලොව ශ්‍රේෂ්ටතම ඉතිහාසයක් සහිත අභිමානවත් සංස්කෘතියකින් සුසැඳි ශ්රී ලාංකේය සමාජය සංස්කෘතික හර පද්ධතීන් හා සබැඳි ප්‍රෞඪ උරුමයන් හා පිවිතුරු බව සුරැකි සමාජයකි. මෙසේ සුසැඳි ශ්රී ලාංකේය ජන සමාජය සංස්කෘතිය සමඟින් ඉදිරියට ගමන් කිරීමේ දී සිංහල හින්දු අලුත් අවුරුද්ද සඳහා හිමි වන්නේ සුවිශේෂී වැදගත්කමකි. අලුත් අවුරුදු උදාව සඳහා සිංහල හින්දු ජනතාව සූදානම් වන්නේ අප්‍රේල් මාසයේ දී ය. සිංහල හින්දු අලුත් අවුරුද්දේ එළඹුම ප්‍රථමයෙන් අප වෙත ගෙන එන්නේ කෝකිල නාදයයි. ඒ සමඟ ම පාරිසරික ව සිදු වන්නා වූ පරිවර්තනය අපගේ සිතට, ගතට ගෙන එන්නේ මිහිරකි. ගස්වැල් ඵල බර ව, කෙත්වතු සරුසාර ව, අස්වනු නෙලනා අපූරු අලුත් සහල් මංගල්‍යයට ජනතාව සැරසෙන්නේ ද මේ අපූරු බක් මාසයේ උදාවත් සමඟ ය.
සිංහල හින්දු අලුත් අවුරුද්ද සිංහල හින්දු ජනයා විසින් සමරනු ලබන්නේ අප්‍රේල් මාසයේ දී ය. එය සංස්කෘතික වහරේ දී බක් මාසය යනුවෙන් ද විග්‍රහ කරනු ලැබේ. මෙසේ සිංහල හින්දු අලුත් අවුරුද්ද සැමරීම තුළින් මුල් අවධියේ දී බලාපොරොත්තු වී ඇත්තේ සූර්යය දෙවියන් වන්දනාමාන කිරීමයි. මෙහි දී සූර්යයා මේෂ රාශියෙන් මීන රාශියට ගමන් කරමින් නව උදාවක් ලබා දෙන බව ජ්‍යෝතීෂ්‍යවේදය තුළින් පුරාණයේ සිට විශ්වාස කරන්නා වූ මතයක් බවට පත් වී තිබේ. මේ තුළින් විද්‍යමාන කෙරෙන්නේ සූර්යයා හා මානව ජීවිතයේ ක්‍රියාකාරකම් කෙරෙහි ඇති අන්‍යෝන්‍ය සම්බන්ධතාවය මුල් කර ගනිමින්, අස්වනු සරුසාර කිරීමේ නිමිත්ත පෙරටු කර ගනිමින් තුති පිදීමේ චාරිත්‍රයක් වශයෙන් ප්‍රාථමික ජනයා අතර මෙම සූර්යය මංගල්‍යය ආරම්භ වී ඇති බව ගම්‍යමාන වේ.
සිංහල හින්දු අලුත් අවුරුද්දේ ආරම්භය පිළිබඳ ව විවිධ අදහස් හා මතිමතාන්තර බොහෝ හඳුනා ගැනීමට හැකි වේ. මහාචාර්ය නන්දසේන රත්නපාල මහතා ප්‍රකාශ කරන්නේ සිංහල හින්දු අලුත් අවුරුද්ද වශයෙන් නිර්මිත වීමට මත්තෙන් මෙම උත්සවය සශ්‍රීකත්වය හා සම්බන්ධ කර ගනිමින් ප්‍රාථමික සමාජයේ ජනයා විසින් සූර්යය දේව වන්දනාව සිදු කළ චාරිත්‍ර‍යේ දිගුවක් වශයෙන් මේ ආකාරයෙන් සකස් වී ඇති බවයි. ක්‍රි. පූ. 3 වන සියවසේ දී බුදු දහමේ ආගමනයත් සමඟින් සූර්යය දේව වන්දනාව සමඟ පැවතියා වූ චාරිත්‍ර වාරිත්‍ර විධික්‍රම සඳහා නව අරුත් ලබා දීමේ ප්‍රතිඵලයක් වශයෙන් බෞද්ධ මුහුණුවරක් සහිත ව අලුත් අවුරුද්ද ඇති වූ බවයි. බුදු දහම ප්‍රචලිත වන යුගයේ දී හින්දු ආගම ද ප්‍ර‍රභල ආගමක් වශයෙන් ක්‍රියාත්මක වූ බව අපට මහාවංසගත තොරතුරු මඟින් ප්‍රත්‍යක්ෂ වේ. හින්දු ආගම දේව සංකල්පයක් ඔස්සේ ක්‍රියාත්මක වන අතර සූර්යයා දේව සංකල්පයක් ලෙස ගෙන ඔවුන් මෙම අලුත් අවුරුදු උදාව සමරන්නට ඇතැයි විද්වත් අදහස් වේ.
අලුත් අවුරුදු උත්සවයේ ප්‍රභවය පිළිබඳ ව ඩබ්ලිව්. ටී. ඒ. ලෙස්ලි ප්‍රනාන්දු විසින් The Island පුවත්පතට ලිපියක් ලියමින් මෙසේ අදහස් ඉදිරිපත් කර ඇත. සිංහලයන් අනාදිමත් කාලයක පටන් අලුත් අවුරුද්ද සමරන අතර ම රොබට් නොක්ස් විසින් සම්පාදිත ලිපියක දක්වා ඇත්තේ අලුත් අවුරුද්ද මාර්තු මාසයේ දී සැමරූ බවයි. එසේ මාර්තු මාසයේ සිට අප්‍රේල් මාසය දක්වා අලුත් අවුරුද්ද ගෙන එන්නට ඇත්තේ උඩරට රාජධානි පාලනයේ අවසාන භාගයේ දී අලුත් අවුරුදු උත්සවය සඳහා රාජකීය අනුග්‍රහය ලබා දුන් නායක්කර් රාජ වංශිකයන් විසින් බව පෙන්වා දී ඇත. එසේ ම ඔවුන් විසින් සිංහල හින්දු අලුත් අවුරුද්ද “පුදු වර්ෂම්” වශයෙන් හඳුන්වා දී ඇත. මෙස් විවිධ අදහස් හා මතිමතාන්තර සිංහල හින්දු අලුත් අවුරුද්ද හා සබැඳී ඇති බව පෙන්වා දීමට හැකි වේ.
මෙම ලිපියෙහි මුඛ්‍ය පරමාර්ථය වන්නේ සිංහල හින්දු අලුත් අවුරුද්ද හා සුසැඳි මනෝ විද්‍යාත්මක පසුබිම පිළිබඳ ව විමසීමක් සිදු කිරීමයි. සිංහල හින්දු අලුත් අවුරුද්ද උදාවේ සිට අවසානය වන තෙක් ම එක පෙළට ජ්‍යෝතීෂ්‍යය හා සබැඳි වතාවත් හා චාරිත්‍ර වාරිත්‍රයන් බොහෝමයක් ඇත. ඒ සෑම වතාවතක් හා සබැඳි මනෝ විද්‍යාත්මක පසුබිමක් ඇත. ඒ පිළිබඳ ව අලුත් අවුරුද්ද හා සමගාමී ව ක්‍රියාත්මක වන්නා වූ චාරිත්‍ර හා වාරිත්‍ර සමඟ මුසු කරමින් සාකච්ඡා කිරීම මෙහි දී වැදගත් කොට සළකනු ලැබේ.
අලුත් අවුරුද්ද හා සමඟ එහි මනෝ විද්‍යාත්මක පසුබිම පිළිබඳ ව සාකච්ඡා කිරීමේ දී ප්‍රථමයෙන් ම අලුත් අවුරුද්ද සඳහා පේ වීම සාකච්ඡාවට බඳුන් කළ යුත්තක් වේ. අලුත් අවුරුදු චාරිත්‍ර ආරම්භ වන්නේ අස්වනු නෙලීමත් සමඟ ය. මේ තුළින් සංකේතවත් කෙරුණේ පසුගිය වසරින් ගෞරවාන්විත ලෙසින් නික්මීම හා නව වසර අභිමානවත් ආකාරයෙන් පිළිගැනීමයි. මේ ආකාරයෙන් නව වසර පිළිගැනීම අභිමානවත් ආකාරයෙන් ආරම්භ කර ක්‍රියාත්මක කරනුයේ ප්‍රධාන අවස්ථාවන් ත්‍රිත්වයක් යටතේ ය. එනම්, පරණ අවුරුද්ද අවසන් කිරීමේ කාර්යය, අලුත් අවුරුදු දා කාර්යය, අලුත් අවුරුද්දෙන් පසු කාර්යය වශයෙනි. මෙහි දී අලුත් අවුරුදු දා කාර්යයන් සියල්ල ම සිදු කරනු ලබන්නේ සිංහල සංස්කෘතියට අදාළ ව යොදා ගන්නා ලද යම් ජ්‍යෝතීෂ්‍යය නැකත් ක්‍රමයකට අනුව ය. එහි දී සුබ මොහොතින් වැඩ අත් හැරීම, ලිප ගිනි මෙලවීම, ආහාර අනුභවය, නෑගම් යෑම ආදීය සියල්ල ම සිදු කරන්නේ සුබ නැකතින් ය.
මිනිස් මනස ගොරහැඬි කරන තෘෂ්ණාව, වෛරය, ඊර්ශ්‍යාව, ලෝභය වැනි දුර්ගුණ විවේචනය කර මුදු මොළොක් මනසක් ඇති කරන විස්මිත මනෝචිකිත්සක ගුණාංග රාශියක් සිංහල අලුත් අවුරුදු චාරිත්‍රයන්හි අඩංගු වේ. සිංහල හින්දු අලුත් අවුරුදු චාරිත්‍රයන්ගේ අරුත ගැඹුරින් විමර්ශනය කරන්නෙකු හට අලුත් අවුරුදු චාරිත්‍රයන්හි ඇති මනෝ විද්‍යාත්මක පසුබිම පිළිබඳ අවබෝධයක් ලබා ගැනීමට හැකි වේ. එවැනි වූ අලුත් අවුරුදු චාරිත්‍ර හා සබැඳි මනෝ විද්‍යාත්මක පසුබිම විමර්ශනය කිරීම මෙම ලිපියේ මුඛ්‍ය පරමාර්ථය වේ.
අලුත් අවුරුදු එළඹීමට මත්තෙන් සෑම නිවසක ම සිදු කරනු ලබන්නා වූ කාර්යයක් වශයෙන් ගේ දොර අලුත්වැඩියා කිරීම හඳුන්වා දීමට හැකි වේ. මේ තුළින් නිවස ආශ්‍රිත ව හා නිවස ඇතුළත සම්පූර්ණයෙන් ම පාහේ අලුත්වැඩියා කරමින් නවමු පරිසරයක් ගොඩ නඟා ගැනීම සිදු කරනු ලැබේ. මේ තුළින් නව පරිසරයක් තුළ දී නිවැසියන්ගේ මනස නවමු තත්ත්වයක් කරා පරිවර්තනය වේ. මේ තුළින් ජීවත් වන්නා වූ පරිසරයේ සිදු වන්නා වූ වෙනස්කම් නිසා මානසික වශයෙන් ද නවතාවයක් ඇති වේ. දුක්මුසු ස්වභාවයන් දුරු වී මානසික වශයෙන් නවතාවයක් ඇති වීම මේ ආකාරයෙන් ගේ දොර අලුත්වැඩියා කිරීම තුළින් සිදු වේ.
අලුත් අවුරුදු චාරිත්‍ර තුළ වැදගත් වන්නා වූ චාරිත්‍රයක් වශයෙන් පුණ්‍ය කාලය පෙන්වා දීමට හැකි වේ. පුණ්‍ය කාලය ලෙසින් සළකනු ලබන්නනේ සූර්යයා මීන රාශියෙන් නික්මුණ වේලාව හා මේෂ රාශියට පිවිසීම අතර කාල පරාසය වේ. ජ්‍යෝතීෂ්‍යයට අනුව මෙම කාල පරාසය කිසිදු සුබ කටයුත්තක් සඳහා සුබ නොවන අතර ඒ මොහොතේ දී අගමික වතාවත්හි නිරත වීම සිදු වේ. ඒ අනුව නිවැසියන් සියලු දෙනා ම ඉතාමත් සැදැහැ සිතින් ආගමික වතාවත්හි නිරත වී ආගමික වශයෙන් ආශිර්වාද ලබා ගැනීම මෙහි දී සිදු කෙරේ. ආගමික වතාවත්හි යෙදීම තුළින් ද මානසික වශයෙන් ව්‍යාකූල තත්ත්වයට පත් වී ඇති මනස නිරවුල් කිරීමක් සිදු වේ. නව වසරක් සඳහා යොමු වීමට සූදානම් වන මොහොතේ දී ආගමික වතාවත් සිදු කර මානසික වශයෙන් නිරවුල් බවක් ඇති කර ගැනීම මෙහි දී සිදු වේ.
ලිප ගිනි මෙලවීම හා ආහාර අනුභව කිරීම ද සිදු කෙරෙන්නේ එක ම නැකැත් වේලාවක දී එකම වර්ණයෙන් සමන්විත වස්ත්‍රාභරණයෙන් සැරසීගෙන ය. ඒ තුළින් සංකේතවත් කරනු ලබන්නේ මිනිසුන් වශයෙන් කිසිවෙකුත් සමාජය තුළ හුදෙකලාභාවයට පත් නොවන බවයි. ඒ ආකාරයෙන් සැරසීමෙන් අනතුරු ව පවුලේ සෑම දෙනා ම සූදානම් කරන ලද කෑම මේසය වටා එකතු වෙමින් ආහාර අනුභවය එක ම මොහොතක දී සිදු කරන අතර පවුලේ ගෘහ මූලිකයා වශයෙන් පියා සෑම දෙනාට ම ආහාර පිඬකින් සංග්‍රහ කිරීම සිදු වේ. මෙහි දී අරුත් ගැන්වෙන්නේ පවුලේ ගෘහ මූලිකයා වශයෙන් පියාගේ ආරක්ෂාව නිරන්තරයෙන් ම හිමි ව බවයි. ඒබ්‍රහම් මාස්ලෝගේ අවශ්‍යතා ධූරාවලියට අනුව දරුවන්ගේ මානසික සංවර්ධනයට අවශ්‍ය වන්නා වූ ආරක්ෂණ අවශයතාවය පූර්ණ කෙරෙන බව මින් ප්‍රත්‍යක්ෂ කෙරේ.
හිසතෙල් ගෑම හා නෑගම් යාමේ චාරිත්‍රය ඉටු කිරීම තුළින් ද මානසික වශයෙන් සුවතාවයක් ඇති කර ගැනීම බලාපෙරොත්තු වේ. හිසතෙල් ගෑම සඳහා සූදානම් කරන ලද තෛලය සකස් කරනු ලබන්නේ ඖෂධීය ගුණ ඇති ශාකමය කොටස්වලිනි. මේ තුළින් අනාගතයේදීත් වඩාත් සෞඛ්‍ය සම්පන්න දිවිපෙවෙතක් සඳහා ආශිර්වාද දීමක් සිදු කෙරේ. ඒ තුළින් මානසික ව ඇතිවන්නා වූ සුවතාවය වඩාත් සුවදායී ජීවන පැවැත්මක් සඳහා පිටුබලයක් බවට පත් වේ. එමෙන්ම නෑගම් යෑම තුළින් අසල්වාසීන් සමඟ පැවතියා වූ ඊර්ශ්‍යාව, වෛරය, ක්‍රෝධය ඉවත් කර නව සමාජ සම්බන්ධතා සඳහා අවශ්‍ය පසුබිම සකස් කර ගනියි. මානසික වශයෙන් වෛරය, ක්‍රෝධය, ඊර්ශ්‍යාව, මාන්නය ඉවත් කිරීම තුළ මානසික සුබසිද්ධිය ඇති වේ.
අලුත් අවුරුදු චාරිත්‍රයක් වශයෙන් නව සඳ බැලීම සිදු කෙරේ. සඳ වනාහී මිනිස් මනසට බලපෑම් කරන්නා වූ සාධකයක් වශයෙන අද තහවුරු වී ඇත. මේ පිළිබඳ ව අතීත ජන සමාජයන්හි මානව පිරිස් යම් අවබෝධයකින් සිට ඇත. ඒ තුළ සඳ බැලීම යන චාරිත්‍රය ද සුබ වේලාවක දී සිදු කිරීම වඩාත් උචිත බව දන්වා ඇත්තේ එහෙයින් බව අපට අවබෝධ වේ. මෙම චාරිත්‍රය තුළින් මිනිස් මනසට බලපෑම් කරන්නා වූ සාධකයන්ගෙන් ආරක්ෂාව ලබා ගැනීම මේ තුළින් බලාපොරොත්තු වී ඇත.
අලුත් අවුරුදු අසිරිය වඩාත් තී‍ව්‍ර කරන කාරණාවක් වශයෙන් අලුත් අවුරුදු ක්‍රීඩා පෙන්වා දීමට හැකි වේ. ඔංචිලි පැදීම, කඹ ඇඳීම, පංච දැමීම, කොට්ටාපොර ගැසීය යනාදී වශයෙන් බොහෝ ජන ක්‍රීඩාවන් අලුත් අවුරුදු උත්සවය ආශ්‍රයෙන් අපට හඳුනා ගැනීමට හැකි වේ. මේ ජන ක්‍රීඩා තුළින් බලාපොරොත්තු වන්නා වූ මූලික ම කාරණාව විනෝදය බවට පත් වූ නමුත් එහි මානසික පැතිකඩ පිළිබඳ ව විමර්ශනය කිරීමේ දී ජය පරාජය සම සිතින් විඳ දරා ගැනීමට හැකි දරුවෙක් සමාජයට බිහි කිරීම මෙහි පරමාර්ථය බව පුළුල් අර්ථයෙන් විමසීමේ දී අවබෝධ කර ගැනීමට හැකි වේ. ඒ තුළින් මානසික වශයෙන් ශක්තිමත් දරු පිරිසක් ඇති කිරීම අරමුණු කර ගෙන ඇති බව පෙන්වා දීමට හැකි වේ.
ඉහත කාරණා එක්තැන් කොට විමසා බැලීමේ දී සිංහල අලුත් අවරුද්දේ අර්ථය ආදරය හා සෙනෙහස ලබා දී මානසික වශයෙන් සුවතාවයක් ඇති කිරීම බව පැහැදිලි වේ. ආදරය නමැති මනෝභාවය අවුරුදු කාලය පුරාවට ම අප්‍රකට ව සිතින් සිතට ගලා යයි. එහි ප්‍රතිඵලයක් වශයෙන් අයිතිය වෙනුවට යුතුකම් වගකීම් පිළිබඳ හැඟීම් ඉස්මතු වෙයි. තමන්ට ප්‍රිය වූවන් සමඟ හුරු පුරුදු පරිසරයක අත්විඳින මේ කායික මානසික අස්වැසිල්ලේ සංහිඳියාව සරළ වූව ද සැහැල්ලු වූව ද ගැඹුරු මානසික පසුබිමක් සහිත ය. ඒ වටා වන සියලු චාරිත්‍ර වාරිත්‍ර සකස් වී ඇත්තේ ඒ මානසික සුවතාවය සාක්ෂාත් කිරීමට ය. අවසන් වශයෙන් සිංහල හින්දු අලුත් අවරුද්ද වනාහී සමස්තයක් වශයෙන් ගත් කළ මානසික පසුබිමක් සහිත මානසික වෘතයක් වශයෙන් පෙන්වා දීම යුක්ති යුක්ත වේ.
Retrieved From ; https://www.yamu.lk/trending/the-birth-of-awurudu-kumaraya-and-awurudu-kumariya/
Retrieved From ; https://factsanddetails.com/south-asia/Srilanka/People_Srilanka/entry-7981.html#chapter-2
Retrieved From ; https://www.ada.lk/opinion/e0b6b6e0b69ae0b78a-e0b6b8e0b784e0b79a-e0b783e0b790e0b6b6e0b791-e0b6/2-322316
ඩී. එම්. කේ. සචිනි සෙව්වන්දිකා
සිව්වන වසර
සමාජ විද්යා අධ්යයනාංශය
මානවශාස්ත්ර හා සමාජයීයවිද්යා පීඨය
ශ්රී ජයවර්ධනපුර විශ්ව වද්යාලය
