විද්‍යෝදය සාහිත්‍ය සම්මාන ප්‍රදානය 2020

සිංහල හා ජනසන්නිවේදන අධ්‍යයනාංශය මගින් දොළොස් වැනි වරටත් සංවිධානය කරනු ලැබූ විද්‍යෝදය සාහිත්‍ය සම්මාන ප්‍රදානය 2020 පසුගිය සැප්තැම්බර් දෙවැනිදා විශ්වවිද්‍යාලයීය සුමංගල මන්දිරයේදී අති සාර්ථක අයුරින් නිමාවට පත් විය.

මෙම අවස්ථාව සඳහා විශ්වවිද්‍යාල ප්‍රතිපාදන කොමිෂන් සභාවේ වත්මන් සභාපති ජ්‍යේෂ්ඨ මහාචාර්ය සම්පත් අමරතුංග මහතා, විශ්වවිද්‍යාලයීය උපකුලපති ජ්‍යේෂ්ඨ මහාචාර්ය සුදන්ත ලියනගේ මහතා සහ මානවශාස්ත්‍ර හා සමාජීයවිද්‍යා පීඨාධිපති මහාචාර්ය ශිරාන්ත හීන්කෙන්ද මහතාද සහභාගී වූහ.

රටේ පැවති අයහපත් වාතාවරණය හේතු කොට ගෙන මෙවර සම්මාන සඳහා කෘති තේරීම අදියර දෙකක් ඔස්සේ ක්‍රියාත්මක වූ අතර නවකතා 150කට අධික ප්‍රමාණයක්, කෙටිකතා සංග්‍රහ 87ක්, කාව්‍ය සංග්‍රහ 100 ක් සහ තීරු ලිපි සංග්‍රහ 28 ක් පමණ විනිශ්චය සඳහා සලකා බැලිණි.

මෙහිදී වසරේ ප්‍රශස්ත නවකතාව, වසරේ ප්‍රශස්ත කෙටිකතා සංග්‍රහය, වසරේ ප්‍රශස්ත පද්‍ය සංග්‍රහය සහ වසරේ ප්‍රශස්ත තීරු ලිපි සංග්‍රහය යන තරග ඉසව් හතර උදෙසා සම්මාන ප්‍රදානය කෙරුණු අතර මෙවර වසරේ ප්‍රශස්ත නවකතාව සහ වසරේ ප්‍රශස්ත කෙටිකතා සංග්‍රහය සඳහා වන සම්මාන ද්විත්වයම හිමි කර ගනු ලැබුවේ එරික් ඉලයප්ආරච්චි විසිනි. ඒ ‘පේත’ නවකතාව සහ ‘විශ්‍රාමික පෙම්වතිය’ නමැති කෙටිකතා සංග්‍රහය සඳහාය. වසරේ ප්‍රශස්ත කාව්‍ය සංග්‍රහය ලෙස අජිත් තිලකසේන විසින් රචනා කරන ලද ‘මොන තරම් අවුලක්ද?’ කෘතිය සම්මාන ලැබූ අතර තීරු ලිපි සංග්‍රහය සඳහා සම සම්මාන පිරිනැමිණි. ඒ අනුරසිරි හෙට්ටිගේ විසින් රචනා කරන ලද ‘ කොළඹ කතා‘ සහ යසවර්ධන රුද්‍රිගු විසින් රචනා කරන ලද ‘යසයාගේ වාක්කිය’ නමැති කෘති සඳහාය.

විද්‍යෝද්‍ය සාහිත්‍ය සම්මාන ප්‍රදානය 2020 සඳහා ආචාර්ය දයාරත්න රණතුංග, විශාරද ජානක වික්‍රමසිංහ, විශාරද ප්‍රදීපා ධර්මදාස සහ ප්‍රදීප් මුතුකුඩආරච්චි යන ගායක ගායිකාවෝ සිය ගීතමය දායකත්වය සැපයූහ.