සාහිත්‍යසූරි සම්මානිත මහාචාර්ය සුනිල් ආරියරත්නයන් ‘සාහිත්‍යරත්න’ අභිධානයෙන්  2021 රාජ්‍ය සාහිත්‍ය සම්මාන ප්‍රදානෝත්සවයේ දී පිදුම් ලබයි

 

විශ්ව ප්‍රසාදිනී, විද්‍යෝදය විභූෂණ, සාහිත්‍ය කලා ශිරෝමණි, තමිළ්මණී, තමිළ්මාමණි ගෞරව නාමයන්ගෙන් පිදුම් ලද සාහිත්‍යසූරි සම්මානිත මහාචාර්ය සුනිල් ආරියරත්නයන් සිංහල සාහිත්‍යයට කළ අනභිභවනීය මෙහෙවර උදෙසා ‘සාහිත්‍යරත්න’ අභිධානයෙන්  මෙවර රාජ්‍ය සාහිත්‍ය සම්මාන ප්‍රදානෝත්සවයේ දී පිදුම් ලැබුවේ ය. එතුමා 1971 දී ශ්‍රී ජයවර්ධනපුර විශ්වවිද්‍යාලයෙන් ප්‍රථම පන්ති සාමාර්ථයක් සහිතව ශාස්ත්‍රවේදී ගෞරව උපාධිය ද 1982 දී දර්ශනසූරි උපාධිය ද හිමිකර ගත්තේ ය. 1985 දී ශ්‍රී ජයවර්ධනපුර විශ්වවිද්‍යාලයට කථිකාචාර්යවරයකු ලෙස සේවයට එක්වන ඔහු 2015 දි විශ්‍රාම ලබනුයේ විශ්වවිද්‍යාලයේ ජ්‍යෙෂ්ඨතම මහාචාර්යවරයා ලෙස යි. 1961 දී ‘අහිංසකයෝ’ නමින් කෙටිකතා එකතුවක් පළ කරමින් සාහිත්‍ය ක්ෂේත්‍රයට අවතීර්ණ වන මහාචාර්ය ආරියරත්න සියයකට ආසන්න කෘති ප්‍රමාණයක් මේ වන විට රචනා කර ඇත. එම කෘති ශාස්ත්‍රීය, නිර්මාණ, පර්යේෂණ, සංස්කරණ හා පරිවර්තන ආදි විවිධ ක්ෂේත්‍රවලට අයත් වේ. ඒ අතුරින් ‘බයිලා කපිරිඤ්ඤා විමර්ශනයක්’,  ‘ග්‍රැම‌ෆෝන් යුගය’, ‘යෙර්මා (මහාචාර්ය ඒදිරිවීර සරච්චන්ද්‍ර සමග) ‘මකරන්ද’, ‘විසිතුරුය රෑ අහස’ , ‘මානවසිංහ ගීත නිබන්ධ’, කෘති වෙනුවෙන් රාජ්‍ය සාහිත්‍ය සම්මාන ද ‘විරුද සහ විරිදු’, ‘සුළු කළිඟුදාවත නම් වූ ප්‍රථම සිංහල ගද්‍ය කාව්‍යය’, ‘ඇහි පිල්ලමක් අතර’ යන කෘති වෙනුවෙන් බෞද්ධ සාහිත්‍ය සම්මාන ද හිමි විය. තවද සංගීත ක්ෂේත්‍රයට කරන ලද සේවය වෙනුවෙන් 1999 දී රාජ්‍ය සංගීත සම්මානය ද දෙමළ සංස්කෘතිය වෙනුවෙන් කළ මෙහෙය උදෙසා වාර්ෂික ව එක් සිංහල ජාතිකයෙකුට පමණක් ශ්‍රී ලාංකේය දෙමළ විද්වතුන් වෙතින් පිදෙන ‘කම්බන්’ සම්මානය 2012 දී ද පිරිනමන ලද්දේ මහාචාර්ය ආරියරත්නයන්ට යි.  චිත්‍රපට 25ක් අධ්‍යක්ෂණය කර ඇති එතුමා අධ්‍යක්ෂණය, තිර රචනය, ගීත රචනය හා නිෂ්පාදනය වෙනුවෙන් ජනාධිපති, සරසවි, ස්වර්ණ ශංඛ ආදි සම්මානවලට ද පාත්‍ර වූයේ ය.

මෙසේ ගෞරවයට සම්මානයට පාත්‍ර වූ මහාචාර්ය සුනිල් ආරියරත්නයන් අභිනවයෙන් පිදුම් ලද “සාහිත්‍යරත්න” අභිධාන ප්‍රදානය වෙනුවෙන් එතුමාට උපකුලපතිතුමා ප්‍රමුඛ ශ්‍රී ජයවර්ධනපුර  විශ්වවිද්‍යාලයේ ශුභාශිංසන පළ කරමු.

 

 

News & Updates

මහපොළ ශිෂ්‍යත්ව ප්‍රදානය (දෙවන ලේඛනය) -2019/2020
April 2, 2022
මානව ශාස්ත්‍ර හා සාමාජීය විද්‍යා පීඨය ප්‍රථම අර්ධ වාර්ෂික පරීක්ෂණය – 2020/21
April 2, 2022
Industry Partnership Program of the Faculty of Humanities and Social Sciences and the HCL Technologies
March 28, 2022
චීන භාෂාව පිළිබඳ ඩිප්ලෝමා පාඨමාලාව (Diploma in Chinese Language) – 2022 දෙවන ශිෂ්‍ය කණ්ඩායම
March 27, 2022
ප්‍රතිඵල නැවත සමීක්ෂණය සඳහා වන අයදුම්පත් කැඳවීමයි
March 25, 2022